Акција за привлекување внимание на јавноста за болни и оштетени дрвја во Скопје
За оваа акција направивме летачки скулптури/силуети на Петар Пан и Ѕвончица кои беа закачени со невидливи најлонски конци на високи дрвја и го дадоа ефектот дека тие всушност летаат во Паркот на Франкофонијата во Скопје. Идејата за оваа акција беше да се сврти вниманието на јавноста кон старите и оштетени дрвја во парковите во Скопје, затоа што Скопје е еден од најзагадените градови во Европа и градските власти воопшто не обрнуваат внимание на дрвјата. Постарите дрвја често се забораваат, а потребна им е посебна грижа како: сечење стари и мртви делови, ослободување на дрвјата од бршлен и ползечки паразитски растенија, затоа што во повеќето случаи смртта и падот на овие дрвја е предизвикан не затоа што тие се толку стари, туку затоа што биле нападнати од ваков вид на паразити. Прашањето за дрвјата во Скопје е меѓу најважните локални прашања затоа што во последните неколку години скоро половина од дрвјата беа исечени за да се обезбедат нови градежни површини. Акцијата беше одлично прифатена, беа опфатени над 100.000 луѓе, една од најгледаните национални телевизии Телма направи посебен прилог за акцијата. Исто така, сите информативни портали во Македонија објавија статии за оваа акција.