Еколошка акција
Оваа урбана акција се состоеше од мапирање на преку 50 локации на илегални депонии и локации за фрлање на ѓубре, и обележување на 16 локации низ РС Македонија кадешто луѓето фрлаат големи количини на тешко ѓубре и градежен отпад. Идеата за оваа акција беше да се креира јавен притисок преку креативна комуникација за проблемот на нелегално отстранување на отпадот и да се притиснат властите да делуваат против овој проблем, да ги исчистат местата и да спречат понатамошно нелегално отстранување на отпадот на несоодветни места во природата. Околините на Скопје, Тетово, Гостивар, Кичево, Охрид и Струга беа таргетирани за оваа урбана акција. Освен поставување ознаки директно до депониите, исто така испративме фотографии од депониите до одговорните институции: Инспекторат на Град Скопје за животна средина и до Министерство за животна средина и просторно планирање на РС Македонија. Оваа акција (веднаш по завршувањето на поставување на последните ознаки) доби огромно внимание од јавноста и медиумите и голем број на споделувања и постови на социјалните мрежи, со што ни помогна нашата акција да стане тема на неделата, максимизирајќи го нејзиниот импакт. Сакаме да нагласиме дека благодарејќи на медиумското внимание кое го доби акцијата и медиумскиот притисок, акцијата го испровоцира Град Скопје да преземе акција и да исчисти некои од местата кои беа дел од интервенцијата. До сега имаме потврда за најмалку 8-10 исчистени места, вклучувајќи и една локација во центарот на Скопје.